政情：大輝逛北京798掘到寶

全國政協會議尋日閉幕，唔少名人趁臨走前嘅空檔四處逛吓，近年人氣熱爆嘅北京798藝術區成為熱辣辣之選。

身兼全國政協委員嘅立法會議員林大輝前日下晝趁會議後空檔，一支公逛798。嗰度係北京重要文化地標，畫廊林立，齋睇藝術展覽、逛時尚用品店同書店，足以消磨大半日，大輝左逛右逛，眨吓眼逛咗三、四粒鐘。

臨走前仲畀佢發現「潮物」，就係一條鑲滿閃令令鈕釦嘅皮手帶，盛惠十五蚊人仔，佢開心到買咗即時戴上手。佢仲發現一位北京唱作歌手相當有才華，花二十蚊人仔買咗隻CD返港慢慢欣賞。

Money18 新功能「18好路數」為你預測心水股票升跌機會率。

林大輝喺798藝術區買咗條新潮手帶，返到香港都戴住佢。