政情：搞搞政：黃傑龍避劫多得黑毛豬
身兼最低工資委員會成員嘅敍福樓太子爺黃傑龍，喺政界嶄露頭角，人氣上升，連運氣指數都高埋。點解？
上禮拜三，黃傑龍應邀啟程去日本考察和牛製品，考察地有兩個選擇，一個係鹿兒島，另一個正係世紀大地震重災區仙台，最後考察團因想見識埋鹿兒島出產嘅黑毛豬，就喺一念之間，令佢避過仙台一劫。
禮拜六即地震翌日天未光，佢同團友本打算取道羽田機場返港，但考慮到羽田機場情況混亂，臨時改去鹿兒島機場再諗辦法，原來鹿兒島機場咁啱逢禮拜六有機飛上海，就係咁，佢前晚由上海轉機安全抵港。
黃傑龍今趟「走難記」仲有小插曲，佢禮拜六凌晨打長途電話返香港入境處求助，表達希望港府代為安排從最近嘅福岡機場搭飛機返港，但入境處到尋日夜晚先至回覆跟進，佢話好彩冇等入境處幫手，唔係都唔知幾時先至返到香港。
設計圖片及對白