政情：泛民三子遲到累流會

立法會審議《殘疾人士院舍條例草案》委員會會議原訂上禮拜五朝早十點九開始，十二個委員當中，有六個應承會出席，點知最後有三人遲大到，在場嘅草案委員會主席兼白鴿黨議員黃成智、工聯會葉偉明同社福界張國柱等咗十五分鐘，結果都仲差一人至夠法定人數，最後因未達到委員會成員人數嘅三分之一，逼住宣布流會。

罪魁禍首係三個泛民主派議員，包括公文袋袋巾傑、職工盟李卓人同社民連「長毛」梁國雄，但佢哋異口同聲話唔係有心搞到流會。袋巾傑話當日臨時要上電視台嘅節目，同建仔副主席兼行政會議成員劉江華辯論預算案，節目去到十一點，佢本來諗住做完節目飛車返立法會仲趕得切，點知返到立法會時已經太遲。

李卓人話開會嗰朝屋企突然有事，要留喺屋企處理小型工程，所以被迫缺席；長毛嘅理由仲離奇，話係因為之前唔見咗身份證，當日要去人事登記辦事處進行補領手續，點知排咗成個鐘隊都未能完成，結果搞到趕唔切。