政情：維園阿哥唔理緋聞女友
公文袋同其餘十幾個團體，尋日喺中環搞咗個集會，批評財爺鬍鬚曾嘅史上最廢預算案，白鴿黨同選民力量呢兩個宿敵竟然喺獲邀之列，早排捲入涉嫌強姦案嘅「維園阿哥」任亮憲都有到場，而同佢傳過緋聞嘅公文袋義工張可怡咁啱又嚟湊熱鬧。
事發後一直封嘴嘅任亮憲尋日一身粉紅同白間條T恤到場，而張可怡就一身綠色打扮，加上佢姍姍來遲，一到場即吸引在場人士目光。不過現場所見，佢哋兩個由始至終都冇交流，唔知係因為唔想再畀人講吖，定係因為再見不是朋友呢？
喺活動上，當白鴿黨兩位立法會議員甘乃威同涂謹申發言時，選民力量班成員就企晒起身，背對住兩位議員，話自己不齒與對方為伍喎，結果搞到白鴿黨西貢區社區主任鍾恩緒大發脾氣兼講粗口，最終要警察調停先收到科。
任亮憲緋聞女友張可怡尋日都有到場，但兩人完全冇交流。
張可怡