政情：鐘錶總會慈善拍賣扶貧
香港鐘錶業總會日前舉行董事會就職典禮，仲即場搞慈善拍賣，主席朱繼陶話籌款係為總會稍後成立嘅慈善基金而設，善款會用嚟扶貧同培訓新人。
總會顧問梁青華用咗四萬蚊就投得六十年代出產嘅絕版TAG Heuer豪華錶，佢話隻錶好超值，但佢唔獨食，隻錶打算等第日再有慈善拍賣就會再捐出嚟，發揮佢嘅慈善價值。
由太子珠寶鐘錶捐出、鑲有百幾粒鑽石、重三卡嘅十八K白金女裝腕錶，叫價更熱烈，最後由已故富商林百欣養子林建康太太以二十二萬元投得，成為全場最貴嘅拍賣品，但林建康話買錶唔係淨係為咗氹老婆，仲細細聲講係要撐老友朱繼陶。
梁青華會將投得嘅心頭好TAG Heuer，繼續用嚟做善事。
林建康（右二）投得名錶，一次過氹老婆、撐老友、做善事，一舉三得。左二為朱繼陶。