政情：賴皮雙響炮撞板唔認衰

財爺鬍鬚曾發表完史上最廢嘅財政預算案後，泛民主派正式向政府宣戰，連帶否決埋本來毫無爭議性嘅臨時撥款議案，令政府面對前所未有嘅憲制危機。搞到如斯田地，都係鬍鬚曾同財經事務及庫務局局長「傻強」陳家強咎由自取，皆因佢哋根本冇政治觸覺兼冇危機意識。

喺發表預算案後接連兩個禮拜都停工冇寫網誌嘅鬍鬚曾尋日復筆，就連甚少寫網誌嘅傻強尋日亦特登寫網誌，兩個人都係同一話題，就係嚟緊禮拜三立法會再度審議嘅臨時撥款議案。若果大家都覺得佢哋吸取到教訓，主動做番啲嘢爭取市民認同嘅話，咁就錯晒嘞！

為缺席投票建制派護航

傻強先為上咗兩會而冇返港投票嘅建制派護航，話佢哋年年都會上京開會，將決議案被否決嘅責任推落佢哋身上並唔公平，然後再批評泛民將政治表態嘅重要性凌駕喺市民利益之上，一個屈尾十將所有責任推晒落佢哋度，好似自己箍票失敗係唔需要負責咁。

鬍鬚曾就喺網誌先自爆收到泛民邀約見面嘅電郵後已即時回覆，並安排會面日子，但對方竟喺會面前單方面表明反對預算案同派六千蚊嘅修訂，仲對佢提不信任動議，字裏行間盡露對泛民嘅不滿。佢更批評泛民否決臨時撥款，係將市民嘅福祉用作政治籌碼，勢要同傻強做雙響炮，將泛民營造成萬惡之源，而自己就係不幸被玩弄嘅可憐角色。

其實，如果唔係鬍鬚曾整出一份咁廢嘅預算案，又點會搞到天怒人怨吖，泛民亦唔會同政府開拖，否決埋臨時撥款。若果傻強喺臨時撥款表決當日，主動撤回決議案，又或者及早向在港嘅建制派箍票，相信政府都唔使咁肉酸。但鬍鬚曾同傻強一次又一次撼頭埋牆都冇吸取教訓，畀市民日鬧夜鬧亦冇好好自省，只係識得賴人哋，睇嚟佢哋真係冇得救。