短打長擊：醫管局必須開刀

鬍鬚曾說過，「政府有錢即係市民有錢」，有少少Sense嘅人都知道係廢噏。至於醫管局撥款增加並唔等於服務質素改善、醫療失誤減少，就珍珠都冇咁真。究其原因，乃資源錯配、架構臃腫、肥上瘦下，醫管局再唔「開刀」改革，只會苦了前線醫護人員以及害了病人！

醫管局成立二十年，每年花費公帑由最初的七十七億元增加至三百三十億元，下年度再增至三百六十八億元，然而，資源年年加，服務質素節節退，有立法會議員質疑「錢唔知用咗去邊」？其實，啲錢係用咗去出糧畀醫管局高層，行政總裁、多名總監、聯網總監及醫院行政總監等，年薪高達二百萬至四百多萬元。有議員指出，高層累積加薪兩成，而前線員工加薪不足百分之五，高層有薪加冇鑊孭，難怪前線做到一肚氣。

前線醫護人員缺乏晉升階梯，最近更因流失率高，醫護鬧人手荒，個個替更超時，做到有氣冇碇抖，喺咁惡劣嘅環境下工作，絕非病人之福。

醫管局撥款增加，服務質素卻每況愈下，據悉，上年度外科緊急個案的新症輪候時間最長為七周，非緊急個案更長達七年。睇個症等七年，大佬呀，粉瘤都變石瘤啦，認真係天方夜譚！醫管局要是成了「白色超級巨塔」，那病人就更加雪上加霜！

醫管局必須徹底檢討管理架構，制訂客觀撥款準則，增加運用資源透明度，改變「肥上瘦下」陋習。此外，善待前線醫護人員，才能留下人才，造福病人。