毒菜無處不在 標準寬鬆靠害

古人話,「民以食為天」,其實,今時今日,呢句說話應該改為「民以食為憂」至啱。憂乜嘢?憂食品安全問題囉!

太一叮唔係危言聳聽㗎,內地問題食品無奇不有,無日無之,作為鄰居嘅香港又點可以獨善其身吖。呢,浸會大學近日研究發現,一個內地入口嘅苦麥菜樣本被驗出致癌物質鎘含量超標達一點四倍,另外十一個來自內地及本地嘅蔬菜樣本包括椰菜花、芥蘭、菜心及西蘭花等,鉛含量亦統統超出歐盟標準。大家試諗吓,本港九成蔬菜由內地入口,浸會大學係咁意檢驗就發現咁多問題,其他未驗過嘅蔬菜究竟含有幾多重金屬等有害物質,邊個知呢?諗落都咪話唔得人驚!

最奇怪嘅係,食環署轄下有個食物安全中心,係負責為食物安全把關嘅,照計內地蔬菜係要經過該中心驗過先至可以輸入本港㗎,點解佢哋發現唔到問題呢?

答案就係,佢哋根本唔當呢啲問題係問題。原來,港府所制訂嘅食物安全標準寬鬆到冇人有,例如蔬菜含鉛量,歐盟、澳洲等國家嘅標準係每公斤少過零點三毫克,而本港嘅標準就係每公斤六毫克,足足高咗十九倍,問你怕未。唔怪得當局成日話本港食物係安全嘅,梗係喇,佢哋將標準訂到咁鬼寬鬆,唔「安全」就假。

總而言之,對於食衞局局長周一嶽等衞生官僚嚟講,一時食唔死人嘅食物,佢哋都認為係安全嘅,至於食咗呢啲食物後,喺日積月累之下會唔會中毒、會唔會致癌,佢哋就一於少理,關人個關,你話係咪靠害呀!

講起呢個周一嶽,真係唔講猶自可,一講把幾火。鋪鋪出現問題食品,佢唔係反應遲鈍,就係輕描淡寫,搞到經常醜態百出。年前內地爆發三聚氰胺奶粉危機,香港亦受到波及,人心惶惶,但周一嶽仲大大聲話進食低於標準嘅三聚氰胺唔會影響健康喎。結果呢,有人請呢位局長大人食一粒熊仔餅咁大把,佢即刻哦哦,耍手兼擰頭。叮,好明顯,周一嶽自己都信唔過當局制訂嘅食物安全標準喇!

話時話,港府一向喜歡自欺欺人,食物安全標準固然寬鬆到冇人有,連關乎全港市民健康嘅空氣質素指標亦弄虛作假,一直沿用二十幾年前嘅標準,仲低過唔少發展中國家,真係失禮死人。難為班高官仲夠膽吹水話要換回藍天白雲,仲要構建乜嘢優質生活圈喎,你話好唔好笑吖。叮!

Money18 新功能「18好路數」為你預測心水股票升跌機會率。