政情：政黨搞活動邱武放飛機
自從政府擴大問責制之後，副局長同政治助理呢啲官場新貴嘅表現就畀人睇到實一實，可惜綜合政黨、區議會，甚至地區團體嘅回應，都對呢班高薪新貴冇乜好評語。
最近有政黨搞活動，本來邀請咗運輸及房屋局副局長邱誠武，據講邱武當初亦冇拒絕，點知最後又係影都冇，呢啲係官僚定係貴人事忙呢？
冇做好自己份工
其實，政府引入問責第二梯隊，都係想同政團、地區多啲聯繫啫，依家本港各大政黨都大搞青年軍，擴充青年黨員隊伍，年輕人對年輕人，照計應該好啱傾至係，點知副局政助咁難請，80後、90後嘅抗爭活動卻愈搞愈激。到底政府同啲問責官員知唔知副局政助應該做乜㗎？