政情：潘佩璆谷囝囝語文有法

香港人成日講學好兩文三語，但新一代又每每被批評兩文不佳、三語欠奉。身為兩子之父嘅工聯會勞工界立法會議員潘佩璆卻冇呢個煩惱，兩個仔語文能力相當好，依家一個係醫生、一個係律師，究竟佢有乜辦法教呢？

潘佩璆係聯合醫院精神科顧問醫生，九十年代曾經舉家去新西蘭同英國工作，佢話當年已經意識到兩文三語好重要，但由於身處外地，點樣令兩個仔學好普通話呢？潘佩璆就諗到，每晚同兩個仔帶寵物散步時，趁機同佢哋用普通話對答，每次講半個鐘，久而久之，兩個仔都講到一口流利普通話。

為咗令兩個竹昇仔學好中文，潘佩璆仲鼓勵兩個仔每日用中文寫日記，而且要幫手用中文回信畀親友，至今兩文三語已達一流水準。唔單止咁，依家潘佩璆同兩個仔傾偈仍然用普通話，佢哋同媽媽溝通就用廣東話，兩兄弟傾偈就講英文，一家人食飯變咗多聲道，認真搞笑。