政情：搞搞政：政府跣傻強佗衰泛民

政府臨時撥款「世紀觸礁」後，政府同泛民議員雙輸，有建制派議員重組事件始末，發現成件事原來有計中計之嫌，始作俑者可能係政府高層自編自導自演嘅陰濕苦肉計，而中計嘅除咗班泛民議員外，仲有踩晒蕉皮嘅財經事務及庫務局局長「傻強」陳家強。

心水清嘅人發現，當日政府並冇派俗稱「狗仔隊」嘅點票隊伍去立法會把守，完全唔似大戰在即嘅狀況；其次，撥款辯論持續三個鐘，政府新聞處必定有人透過電視直播全程監控情況，政府「失票」，冇理由冇人察覺。綜合當日因事離開咗議事廳嘅建制派議員口供，政府由始至終冇打過「求救」電話。

建制派圈子仲流傳，表決前兩日，特首辦高層曾致電某建制派議員，探問禮拜三能否出席投票，一知對方因離境公幹而無法開會時就收線，明顯似「數票」多過「箍票」，就係咁，任由臨時撥款觸礁，向反預算案嘅泛民還以一拳。事件中，孭晒鑊嘅傻強似乎被蒙在鼓裏，結果咪又傻多一次囉！