政情：李鋈麟兄弟搞大六千蚊
政府派錢，唔少名人開定腔會將六千蚊捐出。東華三院總理李鋈麟，同胞弟、博愛醫院總理李鋈發，就打算成立一個小型家庭基金，集合晒李家成員嘅六千蚊，幫助年輕人實現夢想，據講依家已經有十幾人參加，金額高達十萬蚊，但未講申請方法同金額上限。
早幾日李鋈發出席圓玄學院同博愛醫院合辦嘅長者春茗時，話相信距離政府派發六千蚊仲有一段時間，所以佢同哥哥會繼續搵多啲人捐錢，谷大個善款數字，希望可以幫到年輕人實現夢想。無獨有偶，今年博愛醫院暑假會搞個打機活動，善款會用作青少年服務，將喺四月接任主席嘅湯修齊話，佢平時都有同仔女一齊打機親子，所以佢話到時都會帶埋仔女去打機喎。
李鋈發（左）話會同哥哥李鋈麟將政府派發嘅六千蚊集合埋一齊，幫助年輕人實現夢想。中為博愛副主席湯修齊。