政情：建制派博亂難救鬍鬚曾

炮製史上最廢嘅預算案後，財爺鬍鬚曾就變咗過街老鼠，即使掟咗三百六十億公帑嚟派錢，都引發萬人上街怒吼，聲聲促佢落台，白鴿黨更計劃提不信任動議，仲派出四個議員提出，此舉好似開始倒數鬍鬚曾喺官場嘅時間咁。建制派呢個時候都擒擒青扮救火隊，紛紛向立法會主席提動議，希望喺現有機制下，減低不信任動議正式成為今個月三十號大會議程嘅機會，不過，民怨已經沸騰，就算有救生繩梯，都唔代表鬍鬚曾得救！

根據立法會秘書處尋晚六點嘅數字，已經有二十名、即三分一議員提出喺三十號嘅大會提交動議辯論，勢要同白鴿黨議員對撼，目的係喺目前嘅抽籤機制下「溝淡」不信任動議成事嘅機會。提出動議辯論嘅大部分係建制派議員，包括旅遊界謝偉俊討論增加旅遊基建、工聯會葉偉明討論標準工時、體育、演藝、文化及出版界議員霍震霆傾體育政策等，而泛民主派就有五個議員提出對鬍鬚曾嘅不信任動議。

特首辦打電話班救兵

謝偉俊同葉偉明都話，每年都係差唔多時間提出動議辯論，否認要同白鴿黨對撼，不過唔同黨派都有唔肯公開身份嘅建制派成員承認，近日收過特首辦電話，要求佢哋提出動議辯論，務求減低泛民抽中嘅機會，確保鬍鬚曾唔需要喺預算案表決前就要腳痛退場。

《議事規則》講明，如果多個議員提出動議辯論，就要秘書處抽籤決定，同一立法年度冇提出過動議辯論嘅議員會獲優先分配，而多個建制派議員都未試過提出辯論，所以抽中機率好高。

對於建制派出陰招攔截不信任動議成事，白鴿黨黨團召集人李華明就話唔介意，就算佢哋抽唔到喺月底辯論，泛民都會繼續對鬍鬚曾提出不信任動議，唔信建制派次次都阻到喎！