百萬富翁不可恃　貧富懸殊未解決

原來香港真係名副其實嘅百萬富翁之都，花旗銀行調查顯示，本港舊年有五十五萬八千人擁有一百萬港元流動資產，比前年大增四成二，連同其他資產，佢哋嘅平均身家達到九百八十萬元，差少少就係千萬富翁。唔怪之得有人話，香港遍地黃金嘅時代又返嚟嘞。

不過，新增加嘅逾十六萬富翁當中，四成七係靠炒股致富，近三成靠炒樓致富，即係合共近八成新貴係靠炒賣活動發達嘅。有學者就話，富翁錢搵錢，愈嚟愈有錢，但基層市民生活冇改善，貧富懸殊問題愈嚟愈嚴重。

冇錯，香港嘅百萬富翁係增加咗，但貧窮人口數目亦勁升。全港有一百二十幾萬人生活喺貧窮線下，呢個數目仲連年係咁增加。

香港唔單止樓價世界第一，貧富懸殊亦喺全球二十七個發達經濟體中名列首位，超過晒美國同新加坡。而本港嘅堅尼系數一早就超過警戒線。

話時話，貧困人士真係好淒涼，好多人一家幾口就靠幾千蚊綜援生活，捉襟見肘，三餐不繼。有啲獨居長者七老八十，仲要執紙皮幫補生計。更弊嘅係，佢哋通常都係被遺忘一群，尤其係「N無」人士，政府每次派糖都冇佢哋份。

政府漠視貧困階層，激起民憤，各界狂炳之下，政府成立咗關愛基金，話要照顧派糖時無法受惠嘅人士喎。

關愛基金福利小組尋日首次開會提出多項建議，包括向低收入家庭提供一次過二千至三千元租金津貼；向五萬名貧窮兒童發放二千元午膳津貼，為期一年。仲建議津貼長者由他人清潔家居，醫療上亦會協助長者等。

講真，咁嘅小恩小惠只係聊勝於無，幫得一時唔幫得一世。家陣股市樓市暢旺，庫房水浸，政府就話派錢啫，股市樓市一冧，到時仲有冇得派呀？

講到尾，要解決貧富懸殊問題，一定要發展整體經濟。咁多年嚟，香港經濟都獨沽一味。煲呔曾吹水唔抹嘴，話一個金融業就可以養一千萬港人。港府故步自封，實在危險過剃頭，一有風吹草動就大鑊。亞洲金融風暴同全球金融海嘯殺到，本港都首當其衝，教訓仲未夠咩？

計太一叮話齋，港府千祈唔好恃住百萬富翁多就以為好巴閉，要快快趣趣推動產業多元化，創造更多就業職位，先至有助紓緩貧富懸殊問題。叮！