搞搞政：田少寸弟臨老播關懷
雖然富貴黨榮譽主席田北俊成日話，同退黨嘅細佬田北辰會繼續傾非政治議題，但係咪真係做到心冇芥蒂？
田少尋日上電台節目，初初提到細佬都仲係好聲好氣，點知一再被主持質疑兩兄弟性格不一，一個要話事，一個就關懷社會時，田少即刻起槓，仲寸爆咁話：「你話佢關懷社會，田北辰都啱啱係六十歲先嚟做呢樣嘢啫！」佢又話兩兄弟嘅性格分別，就係佢好心急，二少好漏氣。句句頂到盡，睇嚟田少真係氣難下喎！之不過，田二少係遲咗啲，但遲到總好過冇到吖！
喺分享年少經歷時，田少話同細佬當時都唔多關注時事，生活重心圍繞九龍半島，就連香港全貌都唔熟悉，遑論社會政治，但時移勢易，做政治唔可以用純商界嘅邏輯做事，所以細佬會瞓身執垃圾體驗基層生活，富貴黨都唔再保皇，有嗰句講嗰句。
