當員遊行被捕 公文袋冚到實

幾日前嘅反預算案遊行最終釀成警民衝突，警方最後更以暴力清場，破天荒拉逾百名示威者返差館，隨即被各界強烈譴責。之不過，向來開口埋口都講「社會公義」嘅公文袋竟然改作風，冇參與多個民間團體同政黨譴責警方嘅聯署信之外，竟然冚實四名黨員被「塔」嘅消息，有傳聞仲話黨內大佬「傳召」嗰幾個被「塔」黨員去照肺。

想同社民連割席？

公文袋九龍東支部主席余冠威尋日向我哋承認，自己嗰日確喺現場，但聲言當時留低係為照顧部分首次參與遊行嘅朋友，自己只係「意外地跟佢哋衝落去」，結果被捕。佢又煞有介事咁話，自己當日係以網台身份參與，同個黨冇關，而多個民間團體聯合開記招譴責警方時，其實亦有搵佢，不過佢唔得閒，先至冇去到喎。

另一名被捕黨員巫堃泰，無獨有偶話自己係以網台身份去「做嘢」，強調事後亦冇黨大佬「的」佢去問話。本來想搵公文袋黨魁袋巾傑證實吓黨員要「照肺」嘅傳言，但至截稿前都未聯絡得上佢。

查實公文袋組黨以嚟，一直都堅守其大狀專業嘅形象，強調理性溫和，佢哋舊年突然不顧一切，同有政壇「丐幫」之稱、採激烈路線嘅社民連合作搞變相「公投」，確令唔少人大跌眼鏡。所以公文袋今次刻意冚實黨員被「塔」消息，難免令人覺得佢哋想同社民連割席，咪畀「激」字拖累。