電話爆綁架密碼 被告為郭炳湘買藥
新鴻基地產前主席郭炳湘家人遭兩名自稱張子強同黨男子勒索四億元一案續審,控方昨在庭上播放「O記」高級督察假扮郭炳湘夫人助理與匪徒談判的兩段電話錄音。匪徒為印證非招搖撞騙,透露郭炳湘被綁架時內情,包括郭老太當年聲言「攞埋棺材本」,敲定十億元贖金金額;又爆出郭炳江有份參與「講數」;匪徒更自爆當年是由他替郭炳湘買胃藥,而三封勒索信署名「Z」之謎,亦在錄音中得到解答。
警方接手調查郭家勒索案後,派遣高級督察吳宇凡假扮郭炳湘夫人郭李天穎的私人助理黃先生,在○九年十二月二日致電勒索信上寫着的手機號碼,不過未能接通。之後他發短訊留言,表示郭太已收到信件,對方在十二月四日才來電回覆。控方指稱,來電的匪徒便是本案五十八歲首被告陳威行。
臨走約定英文字母「Z」
在這段長約八分半鐘的對話當中,陳威行自稱姓張,開門見山表示:「當初呢我哋係攞十億,你哋就話呢個要股份,呢樣嗰樣,買賣嗰啲嘢咁!唔方便,你哋手頭上畀六億我哋,有四億就話分期畀我哋嘅。」當高級督察吳宇凡訛稱他是「細郭太」(郭李天穎)所聘之私人助理,遇事要跟細郭太商量,陳即表示:「你最好同大郭太(郭炳湘母親郭鄺肖卿)講,大郭太揸主意……『嗰陣時』佢話連棺材本都攞埋出嚟,用家族名義同我哋傾偈嘅。」此外陳又說:「你問吓呢個細郭太佢個先生,我哋係咩嘢人,佢當初有乜承諾,佢就知……首先你證實我係邊個先得嘛,係咪?」
吳趁機表示,「如我話畀佢聽張生張生,佢會唔會唔記得邊個?我諗佢未必記得邊個!」陳遂回答:「佢知唔知?佢又話有病又剩啦。你問佢,佢當初臨走嗰陣時,同我約定有個英文字母嘅,就係最後一個英文字母『Z』,你問佢記唔記得呢件事,同埋佢食咩藥。佢胃痛食咩藥,我半夜三更都買藥畀佢食,呢啲無錯㗎喇……」陳又透露,「係大郭太應承畀十個(指十億元)我哋嘅……嗰陣時有幾多人傾?大郭太、同埋阿……嗰個Thomas都有喺度……即係佢細佬、第二個細佬(指郭炳湘二弟郭炳江)呀!」此時吳一度誤以為對方是指細郭太的弟弟。
「死鬼老大」死前吩咐收數
除綁架內情外,匪徒亦以暗示方式,聲稱他們是世紀賊王綽號「大富豪」張子強同黨。首次通話之後,吳在十二月十五日再透過短訊聯絡,陳翌日才致電回覆,並向吳表示不滿郭家拖延付款,強調「我哋唔係普通人」,更指稱今次是「係我哋個死鬼、『死鬼老大』臨死前吩咐一定要收呢筆數!」當吳表示憂慮以後再有人來要錢,他更提出保證:「無人對得密碼,係得我哋知道個密碼,係得我哋圍內幾個人知道密碼,如果嗰啲人亂嚟,你鍾意點做都得!」郭家收到的勒索信,全部均寫有神秘「Z」字,與陳所講的脗合。
案件編號: HCCC 239/10


首被告陳威行(靠窗者)和次被告郭炳根(前)均否認控罪。

張子強(左)已在內地伏法。 (資料圖片)

郭炳湘(右)的妻子李天穎(左)捲入被勒索案。 (資料圖片)

高級督察吳宇凡