短打長擊：對水務署冇期望有祈盼

跑馬地黃泥涌道日前爆水管，黃泥涌道變成「黃河」，市民清晨上班上學狼狽不堪，個個涉水而行遲大到，交通改道大混亂，但水務署竟然花了約六小時才能關上水掣截流搶修，至晚上七時許才陸續恢復供水。

每次爆完水管，必定更加凸顯水務署的無能。剛過去的情人節，青衣傍晚爆水管，逾萬居民無水用，管理處人員打去求助，但水務署負責駕駛水車的職員竟拒絕奉召加班到場供水！結果首輛水車在事發後逾三小時才到達。

香港爆水管事件無日無之，去年灣仔告士打道繁忙時間爆水管，搞到交通大亂，市民怨聲載道。今次仲大鑊，水務署用了六小時才閂到水掣。據解釋，是因為水深達一呎及變泥黃色，令他們難以找到水掣！

唔通個水掣細到要用顯微鏡才能找到？當然唔係啦，因為水務署表示每個水掣要花十至二十分鐘才能關上。哈！問題就喺呢度，原來佢哋一味靠估冇辛苦，有殺錯冇放過，連閂二十個水掣，導致斷水範圍擴大，搞到跑馬地、銅鑼灣、灣仔都受影響。

係又閂，唔係又閂，梗有一個會中！你話嘞，咁做嘢，有乜辦法唔花六個鐘才能閂到一個水掣！有工程師指出，所有喉管水掣都有紀錄，水務署要找出水掣位置並不難。唉！算了吧，水務署抄錯水錶乃係家常便飯，花六小時閂一個水掣又有乜出奇啫！

市民對水務署已經冇乜期望，之不過有個祈盼：求神拜佛他們千萬不要轉到煤氣公司工作，否則一漏煤氣大家肯定一鑊熟！