籠裡雞又作反 跛腳鴨實死硬

一條船遇上風浪入水，只要船員齊心協力，仲有機會化險為夷。如果個個爭住跳海求生，條船一定沉硬。家陣民怨四起，港府有如怒海孤舟，偏偏有人亂噏廿四推波助瀾，呢條爛船仲頂得幾耐？心照啦。

呢，中央政策組首席顧問劉兆佳尋日回應預算案風波嗰陣，公開踢爆港府面臨管治危機，話近期市民不滿官員同政府施政嘅現象，反映官民關係已到達臨界點，隨時爆發「群眾性不滿」。佢後來可能發現自己講大咗，否認用過「臨界點」三個字。

港府無能，市民怨聲載道，的而且確係事實。舊年有調查發現，愈來愈多港人認同以激烈甚至暴力手段向當局表達不滿。官民關係何止到咗臨界點，直頭好似炸彈咁，隨時爆大鑊添。

問題係，劉兆佳身為港府智囊，係為當局制訂政策度橋嘅「師爺」，居然掉轉槍頭向港府開炮，而且用詞不留餘地，實在匪夷所思。再講吖，作為中央政策組負責人，劉兆佳自己亦參與咗政策制訂。家陣今日之我打倒昨日之我，扮到乜都唔關自己事，喺旁邊講風涼話，同樣係匪夷所思。

叮！冇計啦，正所謂，牆倒眾人推，唔推就蝕底。港府施政失誤，好似落水狗咁畀人窮追猛打，仲唔乘機踩多兩腳咩。話時話吖，曾蔭權政府不得人心，眾叛親離，權力核心中人各懷鬼胎，各說各話，搞到跛腳鴨政府跛上加跛，呢類醜聞市民都見慣見熟咯。

呢嗱，舊年財政預算案公布之前，財爺鬍鬚曾未開聲，行政會議召集人梁振英已經喺旁邊「點評」一番，話唔應該減利得稅喎，都唔知係披露行政會議討論內容吖，定係表達個人意見。

其他行會成員亦唔執輸，爭住同政府打對台。呢，前年社會對復建居屋出現好大爭拗，但行會成員張炳良同鄭耀棠居然同官方立場唱反調，提出要復建居屋。鄭耀棠更激，仲提出恢復定期賣地添，擺明要令港府難堪。

係人都知，行政會議係本港最高決策核心，地位等同「內閣」，成員必須恪守保密同集體負責制，一旦有咗決定，對外亦必須同政府立場保持一致，仲要負責推銷政策。行會成員當政府冇到，當集體負責制冇到，呢啲籠裏雞作反醜聞，喺港英時代嘅行政局根本冇可能發生。叮！

計太一叮話齋，港府本來已經焦頭爛額，行會成員噏得出就噏，添煩添亂，連「蠶蟲師爺」都爆響口明剃港府眼眉，一沉百踩，呢隻跛腳鴨遲早瓜直！