政情：預算案四千條質詢破紀錄

每年預算案出台後，議員都會就政府各個部門嘅開支提出書面質詢，以監察政府嘅資源運用，舊年多個黨派不滿預算案冇長遠扶貧措施，質詢超過三千幾條爆晒燈，點知高處未算高，今年提問多達四千三百五十一題，比舊年多三成六，每個議員平均問七十三條，當中最多議員關注社福政策開支，皆因預算案對貧富懸殊問題隻字不提，其次係教育問題。今次質詢破晒紀錄，足以反映議員對財爺鬍鬚曾嗰份史上最廢嘅預算案怒氣難消。

今年嘅「問題王」陳淑莊就提出咗近三百條質詢，由運動、環保、房屋等乜都有。另一個「問題王」王國興就話會繼續向每個政府部門索取非公務員嘅薪酬數據，包括有幾多人到最低工資，同埋有幾多人合資格攞鼓勵就業交通津貼等。如果佢發現政府剝削嚴重，肯定嘈到拆天，將會成為政府另一個政治炸彈。

仲有泛民主派議員呻話，本身預備咗啲強積金注資嘅提問，點知政府無啦啦急轉彎跪低，嘥晒佢哋啲心機同人力物力喎！班議員咁多不滿，睇嚟鬍鬚曾仲有大把手尾跟。