政情：搞搞政：孫公跨區返學攀山越嶺
尋日都講過，新學年中一減班減過龍，唔少莘莘學子焗住要跨區返學，教育局局長孫明揚唔覺有問題，仲話搭地鐵就搞掂，畀喺減班問題同佢撐到行嘅天文台前台長「黑英」林超英譏笑冇地理知識。咁啱尋日喺中環遇到孫太鍾小芬，問起呢件事，佢即刻為老公抱不平。
孫太話跨區返學唔係乜嘢大問題，事關佢同老公都係過來人。佢話自己細個時由灣仔住所跨區去中西區嘅英皇返學；老公就住喺灣仔鳳凰台，有時為咗慳幾毫子，仲會攀山越嶺去香港仔返學添！講起跨區返學，孫太唔止覺得冇問題，仲話好多家長為咗搵心水學校，都唔介意跨區喎！
講到返學，孫公之前透露過喺小時候，人人返學都喺就近入學，所以佢細個曾經入讀女校寶血，做女校男生。估唔到佢除咗試過就近入學，亦都試過長途跋涉返學，都幾極端喎。