政情：周松崗臨別硬銷港鐵
港鐵行政總裁周松崗除近期幫港鐵拍廣告飾演「站長」推銷南港島線外，尋日更喺港鐵業績會上落力為港鐵省靚招牌，睇嚟佢要做港鐵嘅最佳推銷員，做到退休前最後一分鐘。
周松崗將喺年底退休離任，尋日發布佢任內最後一份港鐵年度業績報告，佢如常咁精神爽利，當被問到港鐵一旦加價，會否提供乘車優惠時，佢即刻滾瓜爛熟咁背出早已準備好嘅台詞，一輪嘴咁話港鐵不時檢討票價優惠，提供啲優惠更係冇一間公司可以做到。至於提到列車經常發生故障，雖然佢話希望乘客體諒，但又話目前港鐵能做到每一千班車，可能有一班車延誤超過五分鐘，已經屬於全球最佳。
至於幾時招聘到接班人，佢話未有咁快，相信未來一、兩個月都未有消息公布。
港鐵最佳推銷員非周松崗莫屬。