政情：葉劉風騷搶功當正自己財爺

財爺鬍鬚曾喺發表被嘲為史上最廢嘅預算案後，一直企硬話冇改善空間，點知一個禮拜唔夠，見完手握立法會過半數票嘅建制派議員後就即刻跪低，為「大佬」煲呔曾上京前撲火，仲火速公布派錢方案，簡直誠信破產。

行動迅速落區獻殷勤

仲記得班建制派喺禮拜一見到鬍鬚曾後，有議員話政府救火要快，否則就「輸埋底褲」。此話當真，事關年底就係區議會選舉，若果鬍鬚曾企硬做守財奴，等於送票畀泛民主派，到時建制派大小政黨肯定輸甩褲。

建制派當中，新民黨主席葉劉淑儀可謂深諳此道，喺預算案發表後當日，佢即落區摷「Ｎ無人辦」；跟住喺派錢方案出台後，佢又第一時間落區派單張報喜。咁殷勤做乜？搶功囉，事關係佢向鬍鬚曾提出人人派六千蚊。

葉劉不諱言個個政黨都係咁做㗎啦，仲透露當日向鬍鬚曾提出派錢建議時，其他在座嘅建制派議員即刻面色一沉，以為唔可行添！

報喜之餘，佢仲諮詢啲街坊嗰六千蚊點攞好？之後再反映畀鬍鬚曾喎！咁都唔止，當派錢方案被抨擊歧視新移民後，佢尋日又搶先去信鬍鬚曾要求派三千蚊畀新移民。

政府有乜政策改變，公布前後都應該做好諮詢嘅工作，鬍鬚曾之前假諮詢就落得如斯田地，而派錢方案出台後，佢亦翹埋雙手唔做嘢，反而葉劉就好似早前預算案嘅宣傳短片咁，黐咗鬍鬚當正自己係財爺，狂搶鬍鬚曾啲嘢嚟做。

不過，葉劉開倉派六千蚊嘅建議已派凸盈餘，若派錢畀新移民嘅建議被接納，財赤肯定擴大，就好似掃晒啲錢同鬍鬚曾出庫房，咁又會唔會被市民鬧爆呢？