淫亂派對侵校園 道德淪亡誰之過

一班後生仔女喺眾目睽睽下接吻、摸胸、模擬性愛動作。呢啲唔係四仔鏡頭，而係本港大學校園發生嘅真人真事，講得具體啲，係理工大學學生嘅情人節派對。

其實，呢種核突場面喺香港早就司空見慣。就以理工大學為例，幾個月前先至被人踢爆有學生喺校內開不文派對，仲將啲相擺上網，搞到校方冇晒面，實牙實齒話要處分搞事學生喎，點知調查仲未有下文，新嘅不文派對又再舉行嘞。

講真，學生玩嘅遊戲真係核突到離譜。睇吓：一名女生騎上蒙咗雙眼嘅男生背上，喺後面餵男生食嘢，個胸壓晒喺男生個背度。有個遊戲要求男女生面貼面用嘴傳送物件，直情好似互咀。不過，如果同其他大學嘅不文派對相比，呢啲只算係小兒科。類似派對幾乎間間大學都開過，有啲場面更激、更不文，如果寫晒出嚟，恐怕會令大家生眼瘡，太一叮惟有學嗰位大陸作家「此處刪去數百字」。

太一叮諗極都唔明，呢班大學生年紀輕輕，點解要搞啲咁嘅嘢呢？父母日捱夜捱賺錢送佢哋讀大學，絕對唔想佢哋學成咁。後生仔，唔該生吓性，自強不息，威番鋪畀老竇老母睇啦！

話時話，怪晒年輕人又唔係幾啱嘅，呢啲只係當今香港社會世風日下、道德淪喪嘅縮影，學校、政府、傳媒都有責任。

大學校方第一個要打屁股，長期以來，無論學生玩到幾出位，校方都闊佬懶理。今次理大情人節派對咁變態，校方居然仲話冇不雅遊戲喎，只要求學生自律同尊重同學嘅感受。大佬，唔通真係要「搞出人命」先至叫做不雅咩？

部分傳媒亦難辭其咎，尤其係淫賤黎旗下壹淫媒，宣淫販賤，無所不為。唔單止污染平面媒體，仲將魔掌伸向互聯網，將虛擬世界搞到烏煙瘴氣，大學生最鍾意上網，點可以獨善其身呀。

仲有，絕對唔可以放過政府部門，特別係影視處。幾年來互聯網色情資訊氾濫，影視處竟然錄得「零檢控」紀錄。當局放縱，色情資訊水銀瀉地。

千祈唔好睇小校園嘅不文活動，俗語話，細時偷針，大時偷金。家陣係模擬性愛動作，第日就會好似近年揭發嘅淫賤教師咁，帶未成年女生去時鐘酒店開房，或者去山邊玩車震。如果政府、學校、家長仲係懶懶閒，今日嘅大學生難保唔會成為新一代淫師。叮！