政情：周總想做第三次「站長」
港鐵近排推咗個新廣告，行政總裁周松崗同海洋公園主席盛智文（扮嘢文）鬥演技，內容係宣傳南港島線，扮嘢文扮熊貓搭地鐵，喺月台遇到飾演站長嘅周松崗，兩雄相遇時，即時嚟個「熊」抱。周松崗話拍廣告都好輕鬆，不過，佢套戲服兼制服遲啲卻要還番畀港鐵。
周松崗話，佢都好鍾意呢輯廣告，比起要着厚重熊貓衫嘅扮嘢文就輕鬆得多，兼且拍個零鐘就收得工，絕對係easy job！只不過，佢套站長制服係兩鐵合併時度身訂造，事隔幾年，佢嘅身材好彩冇乜變，咪用來推銷南港島線囉，順便發揮吓呢套具象徵同歷史意義制服嘅功用。
今年底就榮休嘅周松崗仲話，榮休之時，套制服要歸還畀港鐵，佢希望仲有機會着第三次啦！
周松崗在○七年兩鐵合併時穿上「站長」制服主持首班列車啟動。 （資料圖片）