政情：騰雞美華惹火送別發叔

鄉議局主席劉皇發尋日最後一次主持屯門區議會大會，三名政府處長級官員特別出席，唔知係咪官多吸引團體，尋日多個政黨一早已動員人手喺區會外示威，搞到發叔嘅金盆洗手儀式都加插特別環節。

人稱「騰雞美華」嘅民政事務總署署長陳甘美華專登落區，見到啲示威團體時，卻以冇預先通知為由拒絕現身接信，令示威人士極為不滿。其後佢雖然喺區議會上發言時，不只一次讚屯門區會喺發叔領導下做得非常好、極之好、「成績做到誇啦啦」，氹得發叔笑逐顏開，但係卻因企硬唔接信，激到示威者入會議室高調踩場，仲轟騰雞美華：「連我哋保皇黨都頂你唔順」，氣氛緊張。

最後，發叔都要出來打圓場，幫騰雞美華平息眾怒，佢之前表現幾周到都冇用喇。發叔尋日亦喺會上向一眾共事多年嘅同僚發表「告別演說」，話做人「適當時候做適當嘅事」，自己一直有思量幾時退位讓賢。佢仲借歐陽修題詞《玉樓春》中：「直須看盡洛陽花，始共春風容易別」表心迹，話雖然屯門冇洛陽傾國傾城嘅牡丹花，但對佢呢個生於斯長於斯嘅屯門人，自有其馨香動人之處。