政情：吳文華貓紙計劃壽終

立法會秘書長吳文華（Pauline）接任後創意十足，其中一項新猷係秘書處為議員預備議案辯論推出參考資料嘅「貓紙計劃」，不過，呢項計劃試驗咗三個月，卻冇人幫襯，尋日秘書處宣布失敗，仲話以後都唔再搞。

據講，「貓紙」服務推出以嚟，議員有彈冇讚。有黨派認為預備自己嘅發言資料係議員嘅基本責任，覺得秘書處做嚟多餘。加上服務一推出就觸礁，辯論「釋放劉曉波」議案嘅貓紙只得短短一版紙，比同日辯論嘅「制訂動物友善政策」少三頁，甚至冇提到劉曉波入獄關鍵嘅《零八憲章》，畀泛民鬧爆自我審查，而之後「辛亥革命一百周年」辯論亦落得同樣下場，做咁多嘢仲要畀人鬧。

最慘就係冇人欣賞，冇癮之下，立法會尋日發通告稱，由於只得好少議員會用秘書處嘅貓紙服務，就算議員助理都冇將資料充分利用，所以決定取消計劃，將人力用喺其他方面。