政情：季詩傑返社無意搶位
社民連大分裂後，創黨主席黃毓民同現任主席陶君行兩方陣營均有人離場，不過，分裂亦帶出另一輪勢力重組。早前辭去社民連秘書長一職、再高調退埋黨嘅季詩傑就喺毓民拉隊走人後，扭擰一輪，尋日已重返社民連。
阿季同毓民早輪不時隔空互寸，後者更喺網台大爆前者帶阿陶去「新花都」跳舞，事件弄得滿成風雨，更迫使阿季退黨。毓民同另一議員陳偉業拉隊走人後，身為阿陶「襟兄弟」嘅阿季仍遲遲未肯返去。尋日阿季透露，當初佢退黨，都係因為毓民喺度，如今對方走咗，而佢又想為社民連度多啲好橋，所以決定重返娘家。
不過，阿季都話，依家社民連秘書長一職已被填補，佢亦無意搶位，即使返黨，亦只係做番個普通會員。至於同樣喺黨爭中退黨嘅前財政彭義恍，據講就好享受自由身，暫無歸位之意。
季詩傑