政情：撐鬍鬚曾勇敢 肥胡清兵上身

新一份預算案引起前所未見嘅民間怒潮，重重摑咗財金官員一巴，財爺鬍鬚曾發表報告唔夠一個禮拜，已經嚇到腳軟，尋日佢出席商會舉辦嘅午餐會時，都不得不承認市民對預算案嘅睇法好差，會研究方法補鑊，佢由死撐預算案冇改變嘅空間到家吓拿拿聲跪低，政府威信乜都冇晒啦，但總商會主席胡定旭尋日卻話，鬍鬚曾願意微調方案係勇敢哦，無論佢係擦鞋定代人擋箭，咁樣公然與民為敵都好易惹人反感！

尋日嘅場合係商界人士嘅午餐會，座上客唔少都係政府友好，不過，尋日部分質詢卻好尖銳，有人質疑政府點解唔調整利得稅令商界都受惠？亦有人對預算案嘅建議表示異議，結果，鬍鬚曾都喺發言中承認原建議的確反應唔好，又話已經聽到外界清晰、大聲嘅意見。

呢個午餐會由總商會主辦，肥胡梗係以主席身份撐場，被問到份預算案公布幾日就搞到全城怨恨，鬍鬚曾更加罕有咁喺幾日之後就急急約建制派議員講數、轉軚，身為政府大好友、肥胡嘅睇法卻係：「佢（鬍鬚曾）願意微調預算案，呢個做法勇敢同值得尊敬。」明撐已經成為過街老鼠嘅鬍鬚曾。

無視民憤廢噏

佢嘅說話雖然係主人家嘅客套之言，但都有無視民情、當社會上各種各類憤恨如無物之嫌。試諗吓，鬍鬚曾同政府高層喺預算案公布幾日後就急急跪低，今天的我打倒昨天的我，無非係想阻止呢場政治災難擴散開去，偏偏主掌醫管局、代表商界嘅肥胡卻反其道而行，咁樣同喺民間怒火上加柴添油有乜分別？

噏得就噏雖然係小事，但如果捉錯政治風向，勇嘅代價就太大嘞。