偷閘大盜剃眼眉 警方豈能又懶理

白眉道人就聽得多嘞，唔知有冇聽過「無眉差人」呢？太一叮講緊嘅唔係武俠小說人物，而係活生生嘅現代人，喺邊呀？遠在天邊近在眼前，咪就係香港警方囉。

警方近排成日畀人剃眼眉，舊年鏹水狂徒喺光天化日掟鏹水彈，搞到人心惶惶，跟住又有縱火狂徒連環放火，又係雞犬不寧。出事地點都係警方重兵駐守嘅地方，不法之徒居然太歲頭上動土，當警方係透明嘅。

呢個世界不嬲弱肉強食，警方無能暴露無遺，不法之徒更加無法無天。日前有人大鬧旺角偷鋼閘，就係最經典嘅畸士。

話時話，「快閃鋼閘大盜」嘅道行真係冇得頂，幾日之內旺角花園街一帶至少有五幢舊式大廈中招，拆走咗六個鋼閘，成個作案過程只有十零秒，住客只聽到「砰」一聲，根本唔知發生乜嘢事，係咪神出鬼沒呢？正如有住戶話齋：「光天化日大街大巷都敢拆門偷閘，擺明剃警方眼眉！」

鋼閘本來係用嚟防盜嘅，家陣反而變成賊人嘅戰利品，係咪好諷刺呢？出事嘅都係舊式唐樓，無業主立案法團，無保安人員，無管理公司，所以亦叫做三無大廈，成幢大廈就好似一個冇掩雞籠。

三無大廈唔單止旺角有，本報記者巡視咗多個區域，包括深水埗、油麻地、大角咀、土瓜灣等，發現三無大廈雲集。呢啲樓宇話就話有鋼閘，但都係殘舊不堪，有啲直情係裝假狗，門鎖一早就被拆走，用牛皮膠紙封住個鎖窿。就算有鋼閘，都成日虛掩，任由外人出出入入，偷閘黨唔乘虛而入就奇。

呢啲大廈一入夜就進入冇警時分，有途人入去隨地便溺，有變態佬偷女人底衫褲，仲有道友匿入去high草。居民成日提心吊膽，生命財產都冇保障。尤其係女士，唔敢出夜街，夜晚放工都要老公出嚟接。

咪以為太一叮靠嚇，偷閘黨其實早就殺入深水埗，幾個屋邨商場同公廁嘅鋼閘不翼而飛。呢區話唔埋就係偷閘大盜下個熱門目標。

其實，最令人擔心嘅係當局嘅態度，三無大廈唔係今日忽然出現嘅，已經存在咗幾十年，唔少議員、政黨都呼籲政府關注，可惜都被當耳邊風，依家連鋼閘都畀人偷埋，警方先至賊過興兵，雖然拉咗個疑犯，但係賊人同黨就逍遙法外。

家陣國際金屬價格飆升，偷鋼閘賣係一本萬利嘅生意，睇怕偷閘黨一定食過翻尋味，警方如果再唔嗲唔吊，唔使幾耐，連警署嘅大閘都唔見埋，睇佢哋個臉擺去邊。叮！