政情：藝術節票房封蝕本門
香港藝術節今屆創下有史以嚟最佳嘅票房紀錄，售出超過十二萬張門票，主席李業廣喺上禮拜舉行嘅藝術節開幕禮上，笑晒口咁暗示已經封咗蝕本門，話希望今屆藝術節搞得成功。
銷情咁好，不乏一班政商界名人捧場客，好似金管局前總裁任志剛夫婦係藝術節擁躉，問任總買咗幾多場節目門票，點知佢笑而不答，反而任太就笑笑口好大方咁透露總共買咗八場門票，當中包括歌劇同話劇，話最重要係睇得開心喎！
行政會議成員張建東話即將要去英國倫敦公幹一段時間，要留低太太喺香港，但醒目嘅張太已買咗多場節目門票解悶，佢話無論經典或現代話劇、歌劇都咁鍾意睇。