政情：黑英叫孫公咪U-turn

政府一意孤行推行嘅「自願縮班」計劃鬧得滿城風雨，早前仲爆出教育局唔畀英皇書院學校管理委員會就減班議題進行表決、自行宣布減班嘅醜聞。

一直為母校抱不平、不惜多次同政府唱反調嘅天文台前台長「黑英」林超英，喺英皇書院被教育局迫令縮班一事日前曝光後，前日喺網誌踢爆當局「霸王硬上弓」，並引用該校校管會章程，質疑教局喺校管會冇投票表決下，迫令校方減班係違規嘅做法。教局其後卻引用另一條文，反駁指校管會理應接納港府嘅教育目標、積極推行教局政策至係，雙方刀來劍往，互不相讓。

事隔一日，黑英再度出招，更翻教局舊帳，喺網誌度直指教局當初推行嘅係「『自願』優化班級結構計劃」，當局亦聲言只會「鼓勵」學校參與，故佢哋如今腰斬校管會會議、強行指令英皇減班，係自打嘴巴、違反自己向公眾宣布嘅「自願」減班政策。佢更促請教局，盡快安排校管會成員喺冇壓力嘅氣氛下，自行投票決定係咪支持縮班，「才能把出了軌的政策執行拉回正軌」。

新時代應持守誠信

黑英仲好感嘆咁話，香港喺九七年回歸祖國，終於脫離殖民地統治，可以當家作主，作為特區政府，本應喺呢個新時代，以持守誠信同以大眾嘅利益為港人做事，奈何英皇縮班事件發展至今，「將社會推向倒退，比回歸前更糟」，反映某啲人將社會推倒到比殖民地政府更衰嘅情況。

黑英所指嘅某啲人係邊個就不得而知，但教育局係由孫明揚掌舵，咁都算狠狠摑咗包括孫公在內嘅高官一巴，仲想截住孫公喺縮班事件上唔好U-turn走番殖民地嘅回頭路啫！之不過，孫公喺縮班事件上一直都企得好硬，想佢U-turn唔谷英皇縮班，睇嚟唔係咁易噃！