縱容網上誹謗 淪為妖獸都市

魯迅曾經講過，軟刀子殺人不見血。乜嘢係軟刀子？誹謗就係嘞，尤其係網上誹謗，有啲妖孽喺虛擬世界暗箭傷人，以為神不知鬼不覺，結果都係逃唔過正義嘅審判。

有人喺討論區網站「香港高登討論區」持續發貼文誹謗東方報業集團及其高層成員，東方於○八及○九年兩度興訟，民事控告經營高登嘅兩間公司誹謗。高院原訟庭尋日裁定，三段涉案討論貼文全部屬於誹謗，高登要對其中一段負責，向東方報業集團旗下兩間公司賠償十萬元。今次係本港首宗涉及網上討論區言論嘅誹謗案例，由於司法機構放生另外兩段貼文，東方正考慮係咪提出上訴。

太一叮諗極都唔明，同樣涉及誹謗，點解淨係罰其中一段貼文呢？法官話，被告只係涉案「次等分發人」，如能證實喺無知之下發布有關言論，就可免除責任。由於被告收到原告投訴後，短時間內刪除其中兩段貼文，已負起「合理責任」，所以毋須負責，至於另一段貼文就拖咗八個幾月先至刪除，所以要負責喎。

開講有話，潑出去嘅水收唔番，講出去嘅言論同樣收唔番。互聯網無遠弗屆，幾分鐘甚至幾秒鐘就可以將消息傳到全世界，高登討論區嘅誹謗言論已經對東方造成無可彌補嘅損害，請問「合理責任」從何說起呢？正如執業大律師龔靜儀話齋，作為網主，應自行檢視網上言論，如果懷疑有言論涉及誹謗，就應刪除，以保障被誹謗者嘅利益。高登既冇主動檢視，就算收到投訴亦冇第一時間刪除，唔通呢啲就叫「合理」？

講到保障被誹謗者嘅利益，更加係得啖笑。東方為咗討回公道，今次淨係律師費就使咗二百萬元，仲未計被誹謗而遭受到嘅損失，相比之下，被告只係賠償區區十萬元，兩者完全唔成比例，既體現唔到法律嘅尊嚴，更伸張唔到公義。事實再次證明，香港嘅所謂法治根本係掛羊頭賣狗肉，你被侵權咩，你被誹謗咩，當局一於詐傻扮懵，袖手旁觀，受害者次次都要自己入稟討回公道，簡直豈有此理，叮！

今次係本港首宗涉及網上討論區嘅誹謗案例，裁決影響深遠，可惜司法機構高高舉起，輕輕放低，完全凸顯唔出問題嘅嚴重性。城市大學專業進修學院學術統籌宋立功就講得啱嘞，言論自由係要保障，但言論必須有事實根據，唔可以憑空捏造，今次涉案言論明顯含惡意及虛構，網站喺所謂「合理」時間內刪除就可以免責，絕對唔合理。律師黃國桐亦指出，為保障言論自由及被誹謗言論傷害嘅人士，法庭處理呢類案件時應加重刑罰，以對網絡使用者起阻嚇作用。

冇錯喇，喺外國，網站經營者為網民嘅誹謗言論負上刑責，早就有例可援，香港自稱法治社會，當局對網上誹謗竟然闊佬懶理，變相縱容，實在匪夷所思。其實，就係因為當局監管不力，執法不嚴，加上司法放縱，香港先至咁烏煙瘴氣。

「僧是愚氓猶可訓，妖為鬼蜮必成災。」最近席捲北非及中東嘅茉莉花革命，就係透過網絡迅速傳播，搞到呢啲國家好似骨牌咁，冧完一個又一個。如果港府繼續任由妖孽利用互聯網煽風點火，散布誹謗言論，香港遲早淪為妖獸都市o架咋，叮！