兔年春茗陸續嚟，全國及各省市青聯港區委員早前舉行新春聯歡，筵開逾三十圍，今次亦係大興紡織廠創辦人陳鉅元囝囝陳仲尼（Rock）同新世界集團主席鄭裕彤長孫鄭志剛（Adrian）舊年出任全國青聯副主席後首次，佢哋親力親為，搞得好熱鬧。
阿Rock同Adrian拍住財神即場派利是，人人有份，永不落空。利是入面係一個朱古力金幣，意頭十足。為搞氣氛，阿Rock帶頭捐出一萬蚊銀行禮券抽獎，Adrian就捐出佢家族旗下嘅周大福珠寶金行一萬蚊現金禮券。
新正頭講意頭，中聯辦副主任王志民（中）同全國青聯副主席陳仲尼（右）齊主持點睛儀式。
