政情：棠哥康復佳返家休養
工聯會會長鄭耀棠抱恙多時，我哋上個禮拜同大家講過佢決定長痛不如短痛，為頸椎移位病患入瑪麗醫院開刀做手術，手術成功後經過一個禮拜休養，棠哥康復進度極佳，原先手腳麻痹乏力已消失，尋日仲出院返咗屋企添。不過，兩會在即，棠哥仲需要喺屋企休養一段時間，睇嚟佢肯定要向下禮拜召開嘅北京人大、政協「兩會」告假。
工聯會尋日主動發新聞稿報喜，話棠哥嘅手術由瑪麗醫院脊骨外科權威、港大創傷及矯形外科學系主任陸瓞驥操刀，手術進行咗五個鐘，大病初愈嘅棠哥依家身體狀況良好，胃口好轉，手腳活動自如。
新聞稿引述棠哥指，多謝瑪麗醫院醫護團隊用心治療同照料，感謝各界關心：「我會調養好身體，盡快重投工作。」咁正經嚴肅嘅語氣，完全唔似平日調皮反斗嘅棠哥。