政情：搞搞政：IQ博士似想再坐一會

二○一二年嗰屆立法會選舉，係本港落實政改方案後嘅第一屆，政壇風雲變色依家已見伏筆。本地華資大商會中總嘅立法會代表「IQ博士」黃宜弘，早喺○八年連任後已經話過，完成今屆會期就會退下火線，所以會內早已開始部署接班人，不過最近風聲似有變，內部消息更指IQ博士未定去留。

中總內部嘅消息指出，IQ博士最近突然轉趨活躍參與會務，例如以前唔出席嘅會議，依家都有現身，而且仲好積極出主意添。佢表現得咁「有心有力」，絕對唔似準備退休，所以，唔少會中人士懷疑佢有意想「再坐一會」，如果係咁，中總內部嘅接任安排又可能生變。

IQ博士年前表明計劃退下立法會火線後，最少有兩個有實力會員表態願意接棒，一個係副會長、協成行董事總經理方文雄，一個係常董、有「新金王」稱號嘅黃英豪，而中總高層亦早已開始着手交棒部署，一旦七十二歲嘅IQ博士真係回心轉意想競逐連任，一場內部「協調」勢所難免。據聞，中總高層依家相當關注IQ博士嘅動向，希望早日知佢係咪有意連任，費事因太遲先至協調，傷咗內部和氣，咁就唔好啦。