政情：林健鋒買名車慳唔到稅

預算案宣布大幅增加私家車首次登記稅，及時買車嘅名人可以慳一筆。慳得最多稅嘅係玩具大王蔡志明囝囝蔡加讚（Karson），佢舊年底買咗架新嘅Benz跑車，足足慳咗二十五萬元稅；立法會議員「金勞詹」詹培忠同新民黨主席葉劉淑儀亦係幸運兒。不過，經濟動力嘅林健鋒買咗部百幾萬元嘅新Benz S-Class房車，可惜要下月至交收；買咗新車未交收嘅仲有「五散人」會計界議員陳茂波。

Karson舊年初至買咗架六百一十萬元嘅林寶堅尼，下半年又以三百五十二萬元買咗部白色Mercedes-Benz（平治） SLS AMG coupe跑車，架車嘅首次登記稅為一百六十七萬元，如果以新稅率計就要一百九十三萬元。

至於金勞詹嗰架四十萬元嘅金色豐田Vellfire豪華七人車，如果按新稅率計，就要交十五萬三千幾元首次登記稅，佢因而慳番二萬元稅款。葉劉淑儀去年底都出咗部白色豐田Vellfire Platinum豪華七人車，車價連稅要三十八萬元，但新稅率下就接近四十萬元，幫佢慳咗一萬八千元稅款。金至尊主席黃英豪旗下公司兩個月前訂咗部價值五百多萬元嘅賓利（Bentley）豪華房車，不過，因為車行要執靚部車至能交收，累佢畀多幾十萬元稅。