政情：張建宗硬食「狗官」

政府讓步嘅新跨區交通津貼計劃撥款案尋日喺立法會財委會審議，拖咗一個禮拜後，勞工及福利局飽受夜長夢多嘅折磨，局長張建宗一心只想快刀斬亂麻，點知泛民議員繼續狠轟佢，社民連同分裂出去嘅人民力量更喺議事廳鬥法，仲無獨有偶咁撞橋。事關人民力量嘅黃毓民狠批張建宗係「狗官」；社民連嘅「長毛」梁國雄就整隻狗公仔同狗屋模型出嚟，比毓民嘅口水更上一層樓。佢哋大鬥法無非為咗搶風頭，張建宗唔想節外生枝，惟有以忍字訣應戰，捱轟四個鐘，終於捱到撥款案通過！

無奈自爆月薪28萬

審議撥款時，好多議員嘅發言都扯上日前公布嘅預算案，泛民議員更一致喊打，連日嚟喺議事廳再三出招嘅社民連同人民力量繼續鬥心思。毓民發言時率先出招，狠批張建宗刻薄，連六百蚊嘅交通津貼都將條件定得好高，好似攬到實唔肯放咁。講講吓，佢逼問張建宗一個月幾多錢人工，張一度以人工屬公開資料唔想答，但畀毓民抬主席施壓，最後張建宗無奈答咗句：「二十八萬。」呢句話一講完，議事廳一陣沸騰。

毓民再食住上，狠鬧張建宗坐享高薪，不知民間疾苦：「我依家鬧你狗官……」跟住挑釁咁問：「你唔叫主席裁決？」張建宗面都黑埋，但佢依然唔肯接波，亦冇要求主席裁決，會議繼續進行。

冇耐輪到社民連嘅長毛接棒，佢抬出一個紙製嘅狗屋模型，裏面放咗隻狗公仔，上面黐住張建宗幅相，長毛話：「我今次唔會掟你，你匿喺間屋入面，根本睇唔到基層！」意思即揶揄張建宗係狗官。張再次面露不悅，但佢繼續忍，避過一場口舌之爭，費事議事程序另生枝節，雖然佢想早啲甩難，最後都難逃捱轟四粒鐘嘅命運。