六大產業無寸進 官僚吹水唔抹嘴

港府全年財政錄得七百一十三億元盈餘，同原本預計嘅二百五十二億元赤字相差近一千億元。太一叮發現，雖然財爺曾俊華計數渣到冇朋友，但畫畫就好耍家喎，尤其係畫餅充飢呢家嘢，簡直係大師級啦！

呢，大家都記得金融海嘯爆發後，港府畫餅充飢，喺○九年提出發展六大優勢產業，認為可以成為香港未來發展嘅新動力。點知兩年時間過去，六大產業依然原地踏步，香港發展依然冇乜動力，惟有繼續炒股炒樓，而港府為咗安撫人心，展示「宏圖大志」，仲周不時攞六大產業出嚟講吓，尋日公布新年度財政預算案，當然亦唔例外。

財爺話喎，為咗推動醫療產業發展，當局預留四幅位於黃竹坑、大埔、將軍澳同大嶼山嘅土地，發展私營醫院。講到呢度，大家係咪覺得似曾相識呢？冇錯，呢四幅地早就已經撥出，預算案不過攞出嚟翻炒一下，至於市民最關心嘅公共醫療服務水平下降同前線醫護人手不足問題，反而提都冇提。

至於教育產業咯喎，亦係重彈撥地老調。而事實上，香港嘅大學學額一向唔夠，每年都有超過一萬個合資格考生升唔到資助學位，港府無法滿足自家子弟嘅升學需要，反而妄想吸引大量外地學生來港，以為撥幾塊地就可以打造乜嘢區域教育樞紐，真係發夢都冇咁早啦，叮！

最搞笑嘅係，講到創新及科技產業，財爺話會研究適切措施，推動高端數據中心發展。你知啦，港府講得「研究」嘅嘢，一般冇十年八年都好難成事，科技發展日新月異，到時中國太空人可能已經上咗月球。

至於環保產業同檢測產業，太一叮都唔想再提，大家只要睇吓維港上空嘅黑霧，同埋接二連三嘅假藥醜聞，已經清清楚楚。最慘嘅係文化及創意產業，居然出現大倒退，政府統計處尋日發表六大產業專題研究報告，顯示○九年較○八年，文化及創意產業收益錄得負增長，而且喺短短一年內流失三千幾位人才。

醫療教育淨識撥地，創意產業愈搞愈縮，屈指一數，港府嘅六大產業講咗兩年，至今都係一事無成。對比上海最近提出嘅世界著名旅遊城市大計，有藍圖、有項目、有時間表，除咗一口氣興建十幾個大型景點，總投資超過四百億元，仲話明要喺五年之內完成。競爭對手坐言起行，港府高官坐而論道，再咁落去，香港好快成為中國嘅二流城市。

計太一叮話齋，港府官員冇嘢叻，最大嘅優勢就係吹水，如果世界上有吹水產業呢樣嘢，香港應該好有機會跑出。至於六大產業咯喎，大家都係唔使恨啦，免得希望愈大，失望愈大呀，叮！