政情：撐新交津變食驚風散

勞工及福利局局長張建宗幾經辛苦，先後兩次「跪低」讓步，先至湊夠立法會過半數議員支持新交通津貼計劃，但最後又因為議員討論其他撥款超時，無法如期喺上禮拜五表決，要押後到聽日再戰。除咗政府面臨壓力，一批由原本反對「轉軚」變做支持嘅建制派亦好大鑊，要畀班反對派同民間團體施壓同冷嘲熱諷多一個禮拜。

有熟悉會議程序嘅人士更指出，聽日嘅財委會仲要傾埋一項涉及九億二千幾萬元嘅港鐵南港島線工程撥款，先至可以開始傾新交津，前者雖然未有超支，但估計亦會有唔少港島區議員就工程嘅走線、造價同污染問題發言，隨時又要傾兩粒鐘先完成表決，令當日嘅會議冇咁一半。

表決完南港島線之後，仲要首先處理職工盟李卓人提出嘅終止辯論新交津撥款動議，雖然明知唔會夠票通過，但到時一人一句廢噏幾分鐘，連埋投票可能又要玩番粒幾鐘，剩低唔夠一粒鐘傾真正嘅撥款申請內容，九成九唔夠時間完成表決。加上當日嘅內務委員會臨時加插咗項議程，討論應否引用立法會特權法查港鐵裂軌事件，財委會隨時要被迫押後開波，政府想喺夜晚再臨急加會都唔得。

反對派多咗時間玩嘢

最慘嘅係下禮拜三立法會大會有多項重量級議案，包括停車熄匙同政改本地立法，最壞情況要連傾五日玩到禮拜日先完會，冇可能再加開財委會傾新交津。至於再下一個禮拜，又有一連幾日嘅預算案特別財委會，亦好難再加會，意味新交津一旦無法喺聽日順利表決通過，隨時要押後到三月中至下旬先搞得掂。

咁即係話反對派隨時有多兩至三個禮拜玩嘢，令張建宗同建制派有排捱！早前游說建制派轉軚支持優化版交津計劃時，張建宗已經話嗰幾日冇覺好瞓，依家要攬住個「膠樽」多幾個禮拜，睇怕晚晚都瞓唔着。正所謂食得鹹魚抵得渴，呢鋪點都要受㗎喇！