短打長擊：東廊橋躉移位 豈可當作小事

東區走廊出現歷來最大安全隱憂，該幹道近興發街支路出現橋躉移位險象，造成一條大裂縫，有一至兩厘米闊，承托橋面及橋躉的支座已經變形，睇落幾牙煙。移位橋躉對下的中環灣仔繞道挖掘工程要即時停工，需回填泥土及灌漿防範移位惡化。

如此大件事，關乎駕車人士的安危，路政署理應公布周知。然而，路政署署長劉家強一味淡化東廊橋躉移位的嚴重性，指支座變形無損安全性，只是支座需較預期早更換。不過，東廊橋躉移位及支座變形，市民大眾有知情權，路政署應盡早通知市民，為何卻要等到傳媒披露及追問，才交代事件？

劉家強否認路政署隱瞞及延遲公布，更認為「今次唔係唔簡單嘅事，唔會發生咁小嘅事就去公布」。劉署長此言差矣！橋躉移位都話小事，唔通要塌橋先叫做大事？你就話做大官有過人膽識，泰山崩於前而色不變啫，我等小民翻風落雨路過古樹都會嚇餐死。筆者想起政務司司長唐英年指摘八十後的名言：「剛愎自用加上勇往直前，最後很容易車毀人亡。」劉署長切勿以為小事就收埋。

香港官場充斥着無能懶散之輩，真正關心市民的如鳳毛麟角。今次東區走廊橋躉移位，官員覺得係「小事嚟啫」，如此看來，駕駛人士大可安心使用，偶有顛簸咪當係激勵囉！

生活在香港，好多嘢都好離奇，而做得高官，思維通常特別刁鑽，做老百姓的常聽到高官說「急市民所急」，但當你餓到皮包骨，政府卻拿出毛衣，話畀你知毛衣有多暖，至於肚餓，小事嚟啫！