空氣指標作假 綠色香港無蹤

如果唔係香港大學嘅研究踢爆，好多人都唔知，香港政府依家仲用緊二十幾年前制訂嘅《香港空氣質素指引》。

本來，世界衞生組織喺二○○○年同二○○五年已經兩次更新咗空氣質素指引，港府亦喺○七年委任顧問審查本港嘅舊指引，制訂新嘅空氣質素指標，並喺○九年推出諮詢文件，諮詢早就完結，點知冇咗下文。環境局局長邱騰華做事條條fing，將件事搞到唔湯唔水，新指標都唔知幾時先可以落實。

不過，就算落實咗新指標，都改變唔到香港空氣質素惡劣嘅現狀。政府諮詢文件講到明，「要為香港嘅空氣質素訂定新準則，你我攜手，為改善空氣質素出一分力」。個封面仲不知幾靚添，上面係幾個俊男美女腳踏翠綠草地，背靠藍天白雲，盡情呼吸清新空氣，令人浮想聯翩，有咗新指標，藍天白雲好快就會返嚟嘞。

如果你真係咁諗，就太傻太天真嘞。事關港府建議嘅空氣質素新指標，同世衞嘅指標原來有好大差距。港大李嘉誠醫學院公共衞生學院名譽助理教授黎克勤直言，即使當局採用新建議指標都未能保障公眾健康，該院比較咗新建議指標與世衞標準，發現新指標容許嘅空氣污染物數值比世衞指引高，並容許污染物數量可有多次超標。

比如微細懸浮粒子同可吸入懸浮粒子，世衞容許每年超標三次，港府新建議就容許超標九次，多成兩倍。又如臭氧，世衞唔容許超標，但港府建議就容許每年超標九次。最離譜嘅係二氧化氮，世衞規定唔可以超標，港府建議居然容許超標十八次，問你識驚未！

話時話，港府刻意降低空氣質素標準，等同攞市民條命較飛。港大嘅研究仲指出，新建議指標過分寬鬆會危害兒童肺部，引致哮喘、肺炎、慢性支氣管炎等疾病，若當局採用新建議指標而放棄世衞指標，估計每年會造成一千八百多名可避免嘅死亡人數、九萬多入院治療日數及五百二十萬次求診，估計經濟損失約二百億元。大佬呀，咁同謀財害命有乜分別呀？

講真，件事搞成咁，邱騰華罪無可恕，佢上任後實牙實齒話要改善空氣質素，令香港早日重見藍天白雲，可惜都係齋噏。除咗度出停車熄匙等屎橋之外，佢乜都做唔到，藍天白雲離香港人愈嚟愈遠，搞到市民媽媽聲。佢頭頭撞着黑，竟然鋌而走險，弄虛作假，喺空氣質素指標做手腳，最終唔單止改善唔到空氣質素，仲令市民健康同生命財產受威脅。

唉，難為呢班庸官仲吹水唔抹嘴，講乜嘢「綠色香港，你我共創」添，其實，有佢哋喺台上一日，綠色香港就永遠唔會出現。叮 ！