政情：搞搞政：鬍鬚曾廢噏轉移視線

政府高官成日都講「大市場，小政府」呢句話，但財爺鬍鬚曾日前喺個人網誌度突然提出「大社會」概念，令好多人一頭霧水。

立法會廠商會代表林大輝尋日主動提起鬍鬚曾嘅「大社會」新詞，劈頭第一句就鬧：「都唔明咩嚟嘅！連Google都查唔到。」佢指鬍鬚曾身為財爺，講嘢唔係講畀自己聽，仲要講明白畀七百萬香港人知，「依家淨係拋個名出嚟，叫『大社會』，聽到大家頭都大埋，咁算點呀！」佢仲話：「大婆、細婆就聽過，大社會？摷勻康熙字典同牛津字典都搵唔到！」

大輝仲拆穿鬍鬚曾喺度作啲嘢故弄玄虛，專登放煙霧彈呃市民。佢質疑鬍鬚曾前排反駁「官富民窮」嘅言論引火燒身，突然提出一個唔清唔楚嘅「大社會」概念，根本係苦肉計，博引起爭論，轉移社會視線，佢就可金蟬脫殼。大輝最後話：「最慘係班教通識嘅老師，大社會喎，都唔知點解釋畀班學生聽。」