政情：林偉強離島區議會裸退
鄉事委員會早排改選，連帶影響區議會席位安排。離島區議會主席林偉強唔知係咪見大勢已去，冇再選坪洲鄉委會委員，同時冇埋區議會當然議員嘅身份，即係話連區議會主席都冇得做。
尋日係林偉強最後一次以離島區議會主席身份主持會議，但佢冇乜離愁別緒，既冇放軟手腳，亦唔見佢喺會議上同大家道別，個會仲開足四粒鐘至完。不過，公開會議後，輪到閉門會議環節，個會只係開咗十分鐘，唔知林偉強係咪趁呢個機會同大家say goodbye呢？
臨別秋波，記者最後問佢有乜感受？佢話唔經唔覺喺離島區議會已經服務咗二十六年，依家要退落嚟，點都會有啲唔捨得。不過，佢話呢個係既定制度，就梗要接受喎，又不忘多謝同事一直以嚟嘅協助。