政情：六成市民撐范太做特首

雖然特首選舉嘅戰幔未正式拉開，但兩名疑似候選人政務司司長唐唐同行政會議召集人CY梁振英，無論在明在暗都鬥緊，但睇完一個民調結果後，就覺得佢哋鬥嚟都嘥氣。

社區發展動力培育早前委託香港過渡期研究計劃，訪問咗八百零七名港人對二○一二年新任特首嘅憧憬。結果發現，全國人大常委、立法會前主席范徐麗泰一枝獨秀跑出，足足有六成市民支持佢出任特首，唐唐同公文袋黨魁袋巾傑就分別以五成三同四成五屈居第二同第三位，CY僅得三成七支持率包尾。

調查結果又顯示，無論係最關注通脹、房屋、就業同貧富懸殊嘅基層市民，抑或係關注環境保護同污染問題嘅知青，通通都認為范太最能解決佢哋嘅問題，係做特首嘅不二之選，直情當正佢係Superwoman；關注經濟發展同「冇咩煩惱」嘅中產，就傾向支持工商界出身嘅唐唐；捍衞自由嘅市民，則支持袋巾傑；至於近年密密曝光嘅CY反而食白果，即使同政府唱反調力撐復建居屋，仍未取得市民支持。

負責今次研究嘅浸大政治及國際關係學系教授戴高禮話，市民喺知道范太唔會出選嘅情況下都投佢一票，反映市民對現時兩名疑似候選人都冇好感，難擇其一，仍有一絲憧憬呢位有親中背景但肯講道理嘅「萬能女俠」出嚟幫香港一把；仲話范太做過立會主席嘅背景對佢起咗加分作用，令人覺得佢處事公平喎！

已無數次斷言唔會選特首、仲叫過外界唔好再擺佢上枱嘅范太，例牌對此不作回應，但佢尋日出席分享活動時，就自爆佢喺政壇最低潮之時，全靠家人支持，令佢安然度過。