政情：副局政助低能林公公死攬

擴大問責制請番嚟嗰隊「八國聯軍」副局長同政治助理返咗工兩年幾，表現係點真係有目共睹，怕且市民對佢哋嘅印象只停留喺人工高。立法會政制事務委員會尋日討論問責制同政府嘅立法工作，好多議員係咁發炮。

富貴黨主席劉健儀話除咗「失望」之外，似乎搵唔到第二個形容詞，事關政府一直本末倒置，淨係識有需要時搵佢哋拉票，完全唔會解釋政策。之後心水清嘅白鴿黨副主席劉慧卿就用交通津貼為例，告誡當局唔好再充耳不聞，因為一單交通津貼已經將問題表露無遺。

學神冇理由咁高薪

平時愈鬧愈勞氣嘅工聯會立法會議員王國興尋日索性收起啲火，以一腔近乎哀莫大於心死嘅語氣同政制及內地事務局局長「林公公」林瑞麟講，求其叫一位議員背所有副局政助嘅名，怕且未必可背得晒出嚟，好似佢咁已經答唔晒，真係事實勝於雄辯，箇中原因咪就係啲副局政助平時好少蒲頭囉！

最後連做過問責局長嘅新民黨主席葉劉淑儀亦加入狠批，話政治助理根本係一名「學神」，入政府學嘢，有乜理由值十幾萬一個月吖，根本幾萬蚊已經足夠。佢仲話，自從委任咗一班副局政助之後，煲呔曾嘅民望一直未有起色，原因咪就係個制度令人覺得冇公義囉。

畀班議員圍插，但林公公繼續發揮「人肉錄音機」本能，以一副意見接受、行動照舊嘅態度，不斷重複話會虛心接受批評，明白「廿一世紀開放式」嘅政治工作唔易做，當局珍惜同各黨派嘅溝通，亦明白唔應該「臨急抱佛腳」去拉票，相信下屆特首當選之後、上任之前，會檢討吓政府架構。

吓！咁撒賴都得？林公公竟然將個問題推得一乾二淨，見到隊「八國聯軍」劣績斑斑，佢唔去撥亂反正，反而攬住佢哋，等佢哋繼續白十幾個月人工，唔怪得班議員成日話要摺埋佢個局兼炒埋佢啦！