右手至今扣唔到鈕

【本報訊】陳國柱死裏逃生，但遭轟擊而噴出「血箭」的右手至今未能康復，不能書寫、扣鈕或「攞大銀」，甚至沒冷熱感覺。他昨日大控訴，指即使登上當地救護車，車上亦無繃帶，在醫院淌着血，護士見到他亦「冇動作」，他又直斥菲警其實並非「營救」人質，因他是「自己跳出車」離開旅巴。

昨在庭上所見，陳國柱可自行夾咪，並以雙手做手勢模仿槍手門多薩持槍及開槍動作，但右手動作生硬不靈活，又指持咪的接收器時會「跣手」。現時他左手「啲筋仲黐住晒」，右手「好輕微嘅嘢都做唔到」，影響工作。

陳強調，當日他並非首名被警方「營救」的人質，因菲警從無上車，「我係自己跳出車碌落地」，而車外亦無人接應，他亦是自行走上一輛吉普車，後來與接着上車的李瀅銓母女被轉往一架救護車，但車上無繃帶包紮，救護員只不斷道歉及叫陳自行按着傷口。他亦不知後來是否被送往醫院急症室，因該處護士見到他「滴緊血」也無動作。