焚化爐有着落 邱騰華咪甩底

咪睇環境局局長邱騰華十吓十吓，撞板多過食飯，但勝在招數變化多，掂唔掂冇人知，總之夠搶鏡。呢，今次又輪到玩人工島喇。

無殼蝸牛咪開心住，呢個島起嚟燒垃圾嘅，唔係住人㗎。政府尋日敲定喺石鼓洲旁邊起人工島做現代化垃圾處理中心，除咗焚化爐外，仲有垃圾分類同轉廢為能設施等。邱騰華話石鼓洲運送距離較短，離民居較遠，仲可能為附近離島區域帶嚟就業同經濟效益。

拖拖拉拉，吵吵鬧鬧咁多年，當局終於確定選址。其實市民對邱騰華已經冇乜期待，只希望佢今次可以做得好好睇睇，咪再甩底。

點知選址一公布，呢項工程即時被指存在五大問題，包括要填海建人工島、造價高、完工日期較遲、影響附近水域生態及打擊鄰近長洲幾千漁民嘅生計同旅遊業發展。

香港唔係沙漠，地少人多，空間有限，焚化爐呢類厭惡性設施，全港十八區無論起喺邊區都一定有人反對。之不過，如果唔敢面對問題一味縮沙，減少廢物保護環境只會係紙上談兵，永遠一事無成。

既然係必要設施，拍咗板就要快快趣趣落實，有問題就要解決。當局預計石鼓洲焚化爐二○一八年至投入使用，本身已經太遲，如果諮詢過程節外生枝又拖一大輪，設施要七年後如期完成，睇怕凍過水。叮！

批評聲音固然要聽，但唔等於政府可以無限期諮詢落去，乜都唔做。關鍵係要做好協調溝通，尋求社會嘅最大共識，等工程可以盡快造福香港人。

環境保護係一項龐大又複雜嘅系統工程，就算焚化爐如期啟用，絕對唔代表政府可以高枕無憂。連邱騰華自己都識講啦，解決廢物處理要「多管齊下」，引入焚化爐只係其中之一。

叮！弊在呢位局長一向好大喜功，環保靠齋噏，多管齊下變咗只識辣着火頭，唔識善後。政策花樣多多，巧立名目，但鋪鋪丟架鑊鑊甘，一係見光死，一係半路縮沙，就算勉強推行亦搞到唔湯唔水。

呢嗱，強徵郊野公園土地擴建垃圾堆填區無功而還；徵收膠袋稅備受質疑；閉門造車推出慳電膽現金券計劃卒之胎死腹中；推動電動車因忽視本土科研成果畀人狂炳；停車熄匙苛政遇上運輸業強烈反對，基本上名存實亡。

家陣垃圾焚化爐「劇本」已經有嘞，唔該邱騰華呢次醒醒定定，做番齣好戲畀市民睇。如果搞到一鑊泡，垃圾焚化爐又衰埋，太一叮一定狂叮你班廢過廢物嘅廢官。叮！