政情：領匯延長免費泊車冧議員
喺領匯公布旗下部分停車場將喺四月起加價後，好多議員出聲反對，尤其係受影響地區嘅區議員，批評領匯唔應該加價，加重市民負擔。唔知係咪見反對聲音太大，領匯尋日公布，由三月一號起，加長所有立法會議員同區議員每日免費享用領匯指定停車場嘅時間兩粒鐘。唔知班議員受唔受落呢？
以往每名立法會議員同區議員，每朝八點至凌晨十二點都可以喺領匯指定停車場泊車，方便佢哋服務市民，呢項優惠原意其實唔錯，但部分議員之前畀人揭發濫用優惠，搞到滿城風雨。新安排實施後，以後每朝六點至凌晨十二點，各位尊貴嘅議員都可以免費享用呢項泊車優惠。