政情：搞搞政：陳健波怕咗同僚打針防流感

不嬲將健康擺喺首位、閒時又鍾意打坐強身嘅立法會保險界議員陳健波，甚少打敗仗，即使流感肆虐多年，佢亦毋須靠流感針防身。不過，佢近日終於要向現實低頭，處男下海去打針，迫使佢屈服嘅，竟然係一班立法會同僚。

議員為上鏡唔戴口罩

陳健波話立法會係一個高危之地，事關唔少議員為咗上鏡方便，即使自己病咗都唔會戴口罩，仲經常閂埋門一齊圍噴口水。佢仲自爆曾經畀經濟動力梁劉柔芬同公文袋黨魁袋巾傑兩個「病貓」喺立法會左右夾攻，唔夠兩日連自己都冧埋，唔加強防禦力都唔得。

佢又話一名前同事早前因染上豬流感而不幸過世，囝囝間學校亦有同學染上後搞到「流感上心」要入急症室，更加令佢的起心肝、帶埋囝囝齊齊去打針。佢自細就極怕打針，要打針時更會自動消失，但佢話今次唔知係支針幼，定係姑娘手勢好，打針時竟然一啲都唔痛，唔排除以後年年打，事關健康至上喎！